शेतकऱ्यांसाठी केंद्र व राज्य सरकारच्या वतीने राबवली जाणारी प्रधानमंत्री पीक विमा योजनेत सहभागी होण्याचा कालावधी सुरू झाला आहे. शेतकऱ्यांना १ रुपयात आपल्या पिकाचा विमा काढता येणार आहे. या योजनेत सहभागी होण्याची १५ जुलैपर्यंत मुदत आहे.कृषी विभागाच्यावतीने शेतकऱ्यांनी यामध्ये सहभागी व्हावे, असे आवाहन करण्यात आले आहे.

केंद्र सरकारने प्रधानमंत्री शेतकरी पीक विमा योजना २०१६ पासून सुरू केली. यामध्ये रब्बी आणि खरीप हंगामातील पिकांचा समावेश केला आहे. खरीप हंगामासाठी सुरुवातीच्या टप्प्यात रब्बी हंगामासाठी १.५ टक्के तर खरीप हंगामासाठी विमा संरक्षित रकमेच्या २ टक्के तर दोन्ही हंगामांतील नगदी पिकांसाठी विमा संरक्षित रकमेच्या ५ टक्के रकम शेतकऱ्यांकडून घेतली जात होती.

परंतु , आता राज्य शासन हे पैसे भरणार असून, शेतकऱ्यांकडून केवळ १ रुपया घेण्यात येणार आहे. या योजनेत शेतकऱ्यांना एक रुपया भरून सहभागी होता येणार आहे . या योजनेचा लाभ जास्तीत जास्त शेतकऱ्यांनी घेण्याची आवश्यकता आहे.

‘या’ पिकांसाठी विमा संरक्षण

◼️ तृणधान्य, कडधान्य : भात, खरीप ज्वारी, मूग, उडीद, तूर, मका,बाजरी, नाचणी,

◼️ गळीत धान्य : भुईमुग, सोयाबीन, तीळ,कारळे, सूर्यफूल,

◼️ नगदी पीक : कांदा, कापूस,

गेल्या हंगामामध्ये ५५ हजार शेतकरी सहभागी

पूर्वी प्रधानमंत्री पीक विमा योजनेचे निकष,मिळणारी भरपाई, भरावा लागणारा हप्ता पाहून यामध्ये शेतकऱ्यांचा सहभाग कमी होता परंतु , मागील वर्षीपासून एक रुपयात विमा योजना लागू केल्यामुळे जिल्ह्यातील ५५ हजार ४६७ शेतकऱ्यांनी सहभाग घेतला.त्यातील सातशे नऊ शेतकऱ्यांना ३५ लाख ६८ हजार रुपये भरपाई देण्यात आली आहे .

योजनेचा ऑनलाइन अर्ज असा करा.

■ सर्वात पहिल्यांदा प्रधानमंत्री पीक विमा योजनेची वेबसाईट pmfby.gov.in असे सर्च केल्यानंतर वेबसाईट ओपन होईल.
■ त्यामधील Farmer Application यावरती क्लिक करा.
■ त्यानंतर Guest Farmer यावरती क्लिक करा.
■ नवीन शेतकरी म्हणून नोंदणी केल्या नंतर त्यामध्ये सर्व माहिती भरा.

मोबाइल नंबर टाकून verify वर क्लिक करा.
■ स्क्रीनवर एक captcha कोड दाखवला जातो , तो त्यामध्ये टाकून Get OTP क्लिक करायचे आहे.
■ पहिल्यांदा बँक पासबुक फोटो अपलोड करा.
■ ८-अ उतारा आणि डिजिटल सहीचा सातबारा उतारा इ . एकाच पीडीएफ फाईलमध्ये घेऊन अपलोड करा.