Soyabin bajarbhav : राज्यातील कृषी उत्पन्न बाजार समित्यांमध्ये सोयाबीनची आवक मोठ्या प्रमाणात वाढली असून त्याचा थेट परिणाम दरावर झाला आहे. काही दिवसांपूर्वी दरात तेजी दिसून आली होती, मात्र आता विक्री वाढल्यामुळे दर पुन्हा घसरले आहेत. शेतकऱ्यांनी दरवाढीच्या अपेक्षेने साठवलेला माल बाजारात आणल्याने आवक वाढली आणि दरात जवळपास ₹२०० प्रति क्विंटलची घसरण झाली आहे.
वाशिम जिल्ह्यातील बाजार समित्यांमध्ये गत मंगळवारी सोयाबीनला ₹४,९०० पर्यंतचा दर मिळत होता. मात्र रविवारी कमाल सरासरी दर ₹४,७०० च्या खाली आला. कारंजा, रिसोड आणि इतर बाजारांमध्येही सरासरी दर अनुक्रमे ₹४,७४५ आणि ₹४,७१० इतके नोंदवले गेले. यामुळे शेतकऱ्यांमध्ये दराबाबत संभ्रम निर्माण झाला आहे.
मागील हंगामात सोयाबीनचे दर ₹५,००० पर्यंत गेले होते, पण हंगाम सुरू होताच दरात घसरण झाली. जून महिन्यापर्यंत काही बाजारात दर ₹४,००० च्या खाली गेले होते. साठवणूक केलेल्या मालामुळे दरात काही काळ तेजी आली होती, पण विक्री सुरू झाल्यावर पुन्हा दर खाली आले.
विशेष म्हणजे, खुल्या बाजारात सध्या सरासरी दर ₹४,००० ते ₹४,१०० दरम्यान आहेत. ‘नाफेड’च्या खरेदीसाठी १२% ओलाव्याची अट असल्यामुळे अनेक शेतकऱ्यांना खासगी बाजारातच माल विकावा लागत आहे. यामुळे हमीभावाच्या अपेक्षा अपूर्ण राहिल्या असून शेतकऱ्यांमध्ये नाराजी आहे
