Rabi season : जळगाव जिल्ह्यातील पारोळा तालुक्यात तामसवाडी येथील बोरी धरणाच्या दोन्ही पाटचाऱ्यांतून रब्बी हंगामासाठी सिंचनास पाणी सोडण्यात आल्याने शेतकऱ्यांना दिलासा मिळाला आहे. या हंगामात उन्हाळी ज्वारी, बाजरी तसेच काही प्रमाणात गहू व हरभरा पिकांच्या पेरणीवर शेतकऱ्यांचा भर दिसून येत आहे. बोरी धरणावरून उजवा व डावा असे दोन कालवे कार्यान्वित असून, उजव्या कालव्यातून २९ डिसेंबर रोजी ३५ क्युसेसने पाणी सोडण्यात आले आहे; हा २१ किलोमीटर लांबीचा कालवा १३ गावांना पाणीपुरवठा करतो आणि २ हजार ९९५ हेक्टर क्षेत्र सिंचनाखाली येते, यापैकी रब्बी हंगामात ३०० हेक्टरसाठी ४०० शेतकऱ्यांनी पाण्याची मागणी केली आहे. डावा कालवा ९ किलोमीटर लांबीचा असून त्यावर ७ गावे अवलंबून आहेत आणि १ हजार ५५८ हेक्टर क्षेत्र सिंचनाखाली येते; या हंगामात २५० शेतकऱ्यांनी पाण्याची मागणी केली असून, पहिल्या आवर्तनात १ जानेवारी २०२६ रोजी २५ क्युसेसने पाणी सोडण्यात आले आहे.
यंदा बोरी धरणातून एकूण चार आवर्तने सोडण्यात येणार असून त्यापैकी तीन आवर्तने शेती पिकांसाठी तर शेवटचे एक आवर्तन ग्रामीण भागातील पिण्याच्या पाण्यासाठी राखीव ठेवण्यात आले आहे. या पिण्याच्या पाण्याच्या आवर्तनामुळे १७ ग्रामपंचायतींना थेट लाभ होणार असून उन्हाळ्यातील संभाव्य पाणीटंचाईवर मात करण्यास मदत होणार आहे. रब्बी हंगामात पाणलोट क्षेत्रातील शेतकऱ्यांनी उपलब्ध पाण्याचा नियोजनबद्ध वापर करून या आवर्तनाचा लाभ घ्यावा, असे आवाहन पाटबंधारे विभागामार्फत करण्यात आले आहे.
यंदा अवकाळी पाऊस व अतिवृष्टीमुळे बोरी धरणात मुबलक पाणीसाठा उपलब्ध झाला असून परिसरातील शेतातील विहिरींनाही समाधानकारक पाणी आहे, त्यामुळे शेतकऱ्यांमध्ये दिलासा आणि समाधानाचे वातावरण दिसून येत आहे. खरीप हंगामात अवकाळी व अतिवृष्टीमुळे शेतीचे मोठे नुकसान सहन करावे लागल्याने आता शेतकऱ्यांची मुख्य आशा रब्बी हंगामावर केंद्रित झाली असून, उपलब्ध पाणीसाठ्यामुळे उत्पादन वाढीची अपेक्षा व्यक्त केली जात आहे.
