सी हेवी मोलॅसिसपासून तयार होणाऱ्या इथेनॉलच्या खरेदी दरात वाढ केल्यानंतर आता तेल उत्पादक कंपन्यांनी मक्यापासून तयार होणाऱ्या इथेनॉलला 5.79 रुपये प्रति लिटर इतके प्रोत्साहन पर अनुदान जाहीर केले आहे. सध्या ६६.०७ रुपये दर आहे .या अनुदानामुळे मक्यापासून तयार होणाऱ्या इथेनॉलला 71.86 प्रतिलिटर दर मिळेल.
शुक्रवारपासून (ता. ५) खरेदी करण्यात येणाऱ्‍या इथेनॉलला ही किंमत लागू होईल . इथेनॉल वर्षाच्या उर्वरित कालावधीत या किमती विचारात घेतल्या जाणार आहेत. जीएसटी वगळून हे अनुदान दिले जाईल.
यंदा साखर उत्पादनात घट येईल या अंदाजामुळे केंद्र सरकारने उसाचा रस व सिरप पासून इथेनॉल तयार करण्यासाठी मर्यादा घातली . त्यामुळे सरकारचे 2025 पर्यंत पेट्रोलमध्ये 20% इथेनॉल मिश्रणाच्या कार्यक्रमाला धक्का पोहोचण्याची शक्यता निर्माण झाली. हा धोका टाळण्याकरिता तेल उत्पादक कंपन्यांनी नुकताच सी हेवी मॉलिसिस पासून तयार होणाऱ्या इथेनॉल च्या किमतीत वाढ करण्याचा निर्णय घेतला होता. पाठोपाठ मक्यापासून तयार होणाऱ्या इथेनॉलची किंमत वाढविली आहे.
गेल्या एक-दोन वर्षांपासून साखर उद्योगाबरोबरच धान्य आधारित डिस्टलरीजची संख्‍याही वाढत आहे. सध्या धान्यापासून तयार होणाऱ्या 292 कोटी लिटर इथेनॉलला मागणी आहे.शासनाने सहकार्य केल्यास 500 कोटी लिटर पर्यंत इथेनॉल तयार होऊ शकते असा अंदाज ऑल इंडिया डिस्टिलरीज असोसिएशनचा आहे.
देशात कर्नाटक ,मध्य प्रदेश, महाराष्ट्र, बिहार या राज्यांमध्ये मक्याचे अधिक उत्पादन घेतले जात आहे. अनेक राज्यांमध्ये मक्क्यावर आधारित इथेनॉल प्रकल्प उभे राहत आहेत.
साखर उद्योगातूनही खरेदी किंमत वाढीची मागणी..
तेल उत्पादक कंपन्यांच्या निर्णयानंतर आता साखर उद्योगांनीही बी हेवी मोलॅसिस, उसाचा रस ,सिरपपासून तयार होणाऱ्या इथेनॉलची खरेदी किंमत वाढवण्याची मागणी केली आहे.केंद्राने बी हेवी मॉलिसीस उसाचा रस ,सिरपपासून मर्यादित प्रमाणात इथेनॉल तयार करण्यास परवानगी दिली आहे. या घटकापासून तयार होणाऱ्या इथेनॉलची दरवाढ केल्यास त्यांचा काहीसा लाभ इथेनॉल प्रकल्पांना होऊ शकेल असे साखर उद्योगातील सूत्रांनी सांगितले.
