मक्याच्या बाजारभावातील अस्थिरता आणि दरांतील प्रचंड घसरण यामुळे छत्रपती संभाजीनगर जिल्ह्यातील शेतकरी आर्थिकदृष्ट्या आणखी कोंडीत सापडले आहेत. केंद्र शासनाने यावर्षी मक्यासाठी प्रति क्विंटल २ हजार ४०० रुपयांचा हमीभाव जाहीर केला असला, तरी प्रत्यक्षात या दराची कोणत्याही बाजारात अंमलबजावणी होत नाही. उलटपक्षी, कन्नड व वैजापूर येथे मिळालेला सर्वोच्च दर फक्त १ हजार रुपये इतका असून, कन्नड बाजारात तर केवळ १०० रुपये प्रति क्विंटल एवढा अपमानास्पद भाव देण्यात आला आहे. काही ठिकाणी ८५० रुपयांपर्यंत घसरलेल्या दरामुळे शेतकऱ्यांना पेरणीपासून कापणीपर्यंत केलेला खर्चही परत मिळत नाही, परिणामी त्यांची आर्थिक घसरण अधिक वेगाने होत आहे. वाहतूक, मजुरी, बियाणे, खते आणि कीडनाशके यांसाठी आधीच वाढलेल्या खर्चाच्या ओझ्यात एवढ्या कमी भावात मका विकण्याची वेळ आल्याने शेतकरी अक्षरशः हवालदिल झाले आहेत. याहूनही गंभीर म्हणजे, या अन्यायाविरुद्ध उभे राहून आवाज उठवण्यासाठी जिल्ह्यातील एकही लोकप्रतिनिधी पुढाकार घेताना दिसत नसल्याने बळीराजाचा रोष दिवसेंदिवस वाढत आहे. हमीदराच्या संरक्षणाची अंमलबजावणी न झाल्यास शेतकरी पूर्णपणे बाजाराच्या दाबाखाली कोसळतील, याची जाणीव शासन यंत्रणेला असूनही परिस्थितीत काहीही बदल न होणे हीच खरी शोकांतिका ठरत आहे.