Rain update : भारतीय हवामान विभागाने (IMD) दिलेल्या ताज्या अंदाजानुसार, ऑगस्ट आणि सप्टेंबर महिन्यांत देशभरात विशेषतः मध्य भारत, महाराष्ट्र, आणि दक्षिणी राज्यांमध्ये सरासरीपेक्षा अधिक पावसाची शक्यता आहे. मान्सूनच्या सुरुवातीच्या टप्प्यात काही भागात पावसाची अनियमितता दिसून आली असली, तरी आता हवामान प्रणाली सक्रिय होत असून पुढील आठवड्यांपासून पावसाचा जोर वाढण्याची चिन्हे आहेत.
हवामान विभागाच्या मते, बंगालच्या उपसागरात तयार होणाऱ्या कमी दाबाच्या पट्ट्यांमुळे महाराष्ट्रातील विदर्भ, मराठवाडा आणि कोकण भागात मुसळधार पावसाचे सत्र सुरू राहणार आहे. विशेषतः सप्टेंबरमध्ये ‘रिट्रीटिंग मान्सून’च्या काळातही पावसाचा जोर टिकून राहण्याची शक्यता वर्तवण्यात आली आहे. यामुळे खरीप हंगामातील उशिरा पेरलेली पिके आणि आर्धवट वाढलेली पिके यांना मोठा फायदा होऊ शकतो.
शेतकऱ्यांनी या अंदाजाचा विचार करून पीक संरक्षणाच्या उपाययोजना कराव्यात, असा सल्ला कृषी विभागाने दिला आहे. पावसामुळे पिकांवर बुरशीजन्य रोगांचा प्रादुर्भाव होण्याची शक्यता असल्याने वेळेवर फवारणी, निचऱ्याची व्यवस्था, आणि विमा दाव्यांची तयारी ठेवणे गरजेचे आहे. याशिवाय, पाण्याचा साठा आणि शेततळ्यांचे व्यवस्थापनही या काळात महत्त्वाचे ठरणार आहे.
