Weather forecast : भारतीय हवामान खात्याच्या १९ जून रोजी सकाळी ८.३० वाजता प्रसिद्ध झालेल्या बुलेटिननुसार, महाराष्ट्रात पुढील २४ तासांत काही भागांमध्ये जोरदार पावसाची शक्यता असून, काही जिल्ह्यांमध्ये ऑरेंज अलर्ट (Heavy to Very Heavy Rainfall Warning) जारी करण्यात आला आहे. विशेषतः कोकण, गोवा आणि मध्य महाराष्ट् या भागांत मुसळधार पावसाचा धोका वर्तवण्यात आला आहे.
*कोणत्या जिल्ह्यांत कोणता अलर्ट?*
1. कोकण आणि गोवा: बहुतांश ठिकाणी जोरदार पाऊस होणार असून, रायगड, रत्नागिरी, सिंधुदुर्ग, ठाणे, मुंबई शहर व उपनगर या जिल्ह्यांत ऑरेंज अलर्ट आहे.
2. मध्य महाराष्ट्र: नाशिक, पुणे, कोल्हापूर, सातारा जिल्ह्यांतही ऑरेंज अलर्ट लागू आहे.
3. मराठवाडा आणि विदर्भ: येथे केवळ विजांच्या कडकडाटासह हलक्या ते मध्यम पावसाची शक्यता आहे. त्यामुळे या भागात सध्या यलो अलर्ट जारी आहे.
*कुठे किती पाऊस?*
महाराष्ट्रात मुंबई (कोलाबा) येथे १२ सेमी, रत्नागिरी ८ सेमी, मुंबई सांताक्रूझ येथे ५ सेमी, नाशिकमध्ये ६ सेमी आणि पुणे शिवाजीनगर येथे १ सेमी पावसाची नोंद झाली आहे.
देशाच्या अन्य भागांत झारखंडमधील जमशेदपूरमध्ये सर्वाधिक २३ सेमी, रांचीला १४ सेमी, दाल्टनगंजला ११ सेमी पावसाची नोंद झाली. ही पावसाची तीव्रता झारखंडसाठी रेड अलर्ट दर्शवते.
*मॉन्सूनची महाराष्ट्रातील स्थिती*
मान्सूनची उत्तर मर्यादा सध्या राजस्थान, मध्य प्रदेश, उत्तर प्रदेश, बिहारमार्गे हिमालयाच्या पायथ्यांपर्यंत पोहोचली आहे. महाराष्ट्रातील कोकण, मध्य महाराष्ट्र आणि विदर्भातील बहुतांश जिल्ह्यांमध्ये मॉन्सून पोहोचलेला आहे. मराठवाड्यात काही भागांमध्ये अजूनही मान्सूनची वाट पाहिली जात आहे.
पुढील पाच दिवसांचा महाराष्ट्रासाठी पावसाचा अंदाज
* कोकण आणि गोवा: दररोज मुसळधार पावसाची शक्यता. काही ठिकाणी ऑरेंज अलर्ट कायम राहण्याची शक्यता.
* मध्य महाराष्ट्र: तुरळक ठिकाणी पाऊस, काही भागात मध्यम ते जोरदार पावसाचा अंदाज.
* मराठवाडा: बहुतांश ठिकाणी पाऊस अत्यल्प किंवा नाही. यलो अलर्ट जारी.
* विदर्भ: सुरुवातीला काही ठिकाणी जोरदार पाऊस, नंतर पावसाचे प्रमाण कमी होईल.
कोकण आणि घाटमाथ्याच्या परिसरात जमिनी ओलसर झाल्यामुळे काही भागांत दरडी कोसळण्याचा धोका आहे. शेतकऱ्यांनी पीक व रोपवाटिकांची योग्य काळजी घ्यावी. नागरी भागांत पाणी साचण्याची शक्यता असल्यामुळे नागरिकांनी वाहतूक टाळावी आणि हवामान विभागाच्या सूचनांचे पालन करावे.
