sugar factory : राज्यातील साखर कारखान्यांचा गळीत हंगाम सुरू होऊन दीड महिना पूर्ण झाला असून, या कालावधीत १८४ खासगी व सहकारी साखर कारखान्यांनी एकूण ३ कोटी ६७ लाख ९० हजार टन ऊस गाळप केला आहे. साखर उताऱ्याच्या बाबतीत कोल्हापूर विभाग आघाडीवर असून सुरुवातीलाच सरासरी ९.७५ टक्के उतारा नोंदवला आहे, तर एकूण गाळपात पुणे विभाग पुढे असून त्यांनी ८६ लाख ७१ हजार टन ऊस गाळप केला आहे. वैयक्तिक कारखान्यांमध्ये बारामती ॲग्रोने सर्वाधिक ९ लाख ४२ हजार टन ऊस गाळप करून आघाडी घेतली आहे, ज्यामुळे राज्यातील साखर उद्योगातील विभागनिहाय कामगिरी स्पष्टपणे दिसून येते.
यंदाच्या साखर हंगामाची सुरुवात नोव्हेंबरच्या पहिल्या आठवड्यात झाली असून, अवघ्या दीड महिन्यात राज्यातील १८४ साखर कारखान्यांनी तीन कोटी ६७ लाख टन ऊस गाळप केला आहे. या गाळपातून तीन कोटी सात लाख ४६ हजार क्विंटल साखरेचे उत्पादन झाले असून, हे प्रमाण गेल्या वर्षीच्या तुलनेत १५ डिसेंबरअखेर तब्बल एक कोटी ६२ लाख टनांनी अधिक आहे. गाळपात पुणे विभाग आघाडीवर असून येथील २९ कारखान्यांनी ८६ लाख ७१ हजार टन ऊस गाळप केला आहे, तर ३५ कारखाने असूनही कोल्हापूर विभाग यंदा गाळपात मागे राहिल्याचे चित्र दिसून येते.
राज्यातील चालू साखर हंगामात गाळपाच्या बाबतीत पुणे व कोल्हापूर विभागातील कारखान्यांनी आघाडी घेतली असून, बारामती ॲग्रो (पुणे) ९ लाख ४२ हजार टन गाळपासह राज्यात प्रथम क्रमांकावर आहे. त्यापाठोपाठ दौंड शुगर (७ लाख ८९ हजार टन), कल्लाप्पाण्णा आवाडे हुपरी (५ लाख ८९ हजार टन), तात्यासाहेब कोरे वारणा (५ लाख ५७ हजार टन) आणि दत्त शिरोळ (४ लाख २५ हजार टन) हे पाच कारखाने अव्वल ठरले आहेत. १५ डिसेंबरअखेरच्या तुलनात्मक हंगामात २०२४-२५ मध्ये एकूण १९१ (९५ सहकारी व ९६ खासगी) कारखाने कार्यरत होते, तर २०२५-२६ मध्ये ही संख्या १८४ (९१ सहकारी व ९३ खासगी) आहे. मात्र, गाळपाच्या प्रमाणात मोठी वाढ दिसून येत असून मागील हंगामातील २.५ कोटी टनांच्या तुलनेत यंदा ३.६७ कोटी टन गाळप झाले आहे, तसेच सरासरी साखर उताराही ८.०३ टक्क्यांवरून ८.३६ टक्क्यांपर्यंत वाढलेला आहे.
