kanda bajarbhav: मागील आठवड्यापासून कांद्याच्या बाजारभावात राज्यात पुन्हा वाढ होताना दिसत असून सध्या राज्यातील प्रमुख कांदा बाजारसमित्यांमध्ये कांद्याचे सरासरी दर २४०० ते २५०० रुपयांच्या दरम्यान टिकून आहेत. दरम्यान मंगळवारी संपूर्ण देशात सुमारे ४८ हजार टन कांदा आवक झाली, तर बुधवारी २८ हजार टन कांदा आवक झाली. तर सोमवारी ही आवक ४७ हजार टन इतकी होती. त्यामुळे बाजारभावात १ ते दीड रुपयाचा चढ उतार सुरू असल्याचे व्यापाऱ्यांनी सांगितले.
दिनांक १ जानेवारी २५ रोजी लासलगाव बाजार समितीत लाल कांद्याला सरासरी २४५१ रुपये प्रति क्विंटल बाजारभाव मिळाला. या ठिकाणी सुमारे ३० हजार क्विंटल कांदा आवक झाली. पुणे बाजारात आवक घटलेली दिसून आली. याठिकाणी कांद्याची आवक सुमारे ९ हजा क्विंटल होऊन कांद्याला सरासरी २७५० रुपये बाजारभाव मिळाला. पिंपळगाव बसवंत येथे पोळ कांद्याला २३०० रुपये सरासरी प्रति क्विंटल बाजारभाव मिळाले. सोमवारच्या तुलनेत नाशिक जिल्हयातील बाजारसमित्यांमध्ये कांदा बाजारभावात १ ते २ रुपयांची घसरण झाली. दुसरीकडे पुण्यात मात्र भाव वधारलेले दिसून आले.
सध्या संक्रांतीचा सण आणि दक्षिणेतील पोंगल सण असल्याने संक्रांतीपर्यंत म्हणजेच १४ जानेवारीपर्यंत बाजारभाव टिकून राहतील तसेच त्यात १ ते २ रुपयांनी चढ उतार होण्याची शक्यता व्यापाऱ्यांनी व्यक्त केली आहे. त्यामुळे नव्या वर्षातील संपूर्ण आठवडा आणि येणाराही आठवडा कांद्याचे बाजारभाव तुलनेत टिकून राहतील अशी शक्यता आहे.
