Tukaram Beej:जगद्गुरु श्री तुकोबाराय त्रिशकोत्तर अमृत महोत्सवी सदेह वैकुंठगमन सोहळ्यानिमित्त भंडारा डोंगर पायथ्याशी गाथा पारायण सोहळ्याचे आयोजन करण्यात आले. या निमित्त उपमुख्यमंत्री एकनाथ शिंदे यांनी उपस्थित राहून वारकऱ्यांशी संवाद साधला आणि भंडारा डोंगर व देहूच्या विकासासाठी शासन सर्वतोपरी मदत करेल, अशी ग्वाही दिली.
तुकाराम बीज हा वारकरी संप्रदायासाठी एक पवित्र दिवस मानला जातो. संत तुकाराम महाराजांनी ज्या दिवशी सदेह वैकुंठगमन केले तो दिवस फाल्गुन वद्य तृतीया म्हणून साजरा केला जातो. यंदा त्यांच्या ३७५ व्या वैकुंठगमन सोहळ्यानिमित्त भंडारा डोंगर पायथ्याशी आयोजित गाथा पारायण सोहळ्यात हजारो भाविक सहभागी झाले.
उपमुख्यमंत्री शिंदे यांनी या प्रसंगी सांगितले की, भंडारा डोंगर वारकरी संप्रदायाचे श्रद्धास्थान आहे. येथे मंदिर उभारणीसाठी शासन सर्वतोपरी सहकार्य करेल. तसेच वारकऱ्यांच्या सोयीसाठी भंडारा डोंगरातून जाणारा बोगदा मार्ग बदलण्यात आला आहे. देहू आणि पंढरपूरमधील वारकरी संप्रदायाच्या सुविधा वाढवण्यासाठीही शासन कटिबद्ध आहे.
राज्यातील संतपरंपरा आणि वारकरी संप्रदायाला चालना देण्यासाठी काही महत्त्वपूर्ण विकासकामे हाती घेण्यात आली आहेत. इंद्रायणी नदी स्वच्छता प्रकल्पासाठी मोठा निधी उपलब्ध करून देण्यात आला असून, प्रत्येक तालुक्यात वारकरी भवन उभारणी केली जाणार आहे. पंढरपूर येथे ६५ एकर जागेत कायमस्वरूपी मंडप उभारण्याचा निर्णय घेण्यात आला असून, १२५ एकर जागेबाबत महसूल विभागाशी चर्चा सुरू आहे.
दर्शन रांगेच्या सुविधा सुधारण्यासाठी अतिरिक्त निधी उपलब्ध करून देण्यात येणार आहे. तसेच वारकरी संप्रदायाच्या पहिल्या पद्मश्री पुरस्कारासाठी मारोती महाराज कुऱ्हेकर यांच्या नावाची शिफारस केंद्र सरकारकडे करण्यात येईल, असेही शिंदे यांनी जाहीर केले.
या गाथा पारायण सोहळ्यास खासदार श्रीरंग बारणे, आमदार विजय शिवतारे, शरद सोनवणे, सुनील शेळके, देहू संस्थानचे अध्यक्ष पुरुषोत्तम महाराज मोरे आणि वारकरी संप्रदायातील अनेक मान्यवर उपस्थित होते. राज्यभरातून हजारो वारकरी या सोहळ्यासाठी भंडारा डोंगर पायथ्याशी एकत्र आले होते.
शासनाच्या या पुढाकारामुळे भंडारा डोंगर आणि देहू परिसराच्या विकासाला गती मिळणार असून, वारकरी संप्रदायासाठी अधिक उत्तम सुविधा उपलब्ध होणार आहेत.
