गेल्या २४ तासांमध्ये देशात विविध भागांत वादळी वाऱ्यासह पावसाची नोंद झाली. त्रिपुरा, तमिळनाडू, मध्य प्रदेश, मेघालय, तेलंगणा, आंध्र प्रदेश, लक्षद्वीप, ओडिशा आणि कर्नाटकात हलक्यापासून मध्यम पावसाची नोंद झाली. त्रिपुरामधील कैलाशहर येथे सर्वाधिक ७ सेंटीमीटर पाऊस पडला. उर्वरित देशात तापमानात मोठ्या फरकाची नोंद झाली असून अनेक भागांत उष्णतेची लाट जाणवली. पूर्व मध्य प्रदेश, पश्चिम राजस्थान, जम्मू-काश्मीर, हरियाणा, पंजाब, बिहार आदी ठिकाणी किमान तापमान सरासरीपेक्षा जास्त होते. देशातील सर्वाधिक कमाल तापमान ४६.६ अंश सेल्सिअस हे उत्तर प्रदेशातील बंदा येथे नोंदवले गेले.
महाराष्ट्रातील हवामानाबाबत बोलायचे झाले तर, कोकण, गोवा, मध्य महाराष्ट्र आणि मराठवाड्यात वादळी वाऱ्यासह पाऊस होण्याची शक्यता आहे. कोकण, गोवा आणि दक्षिण मध्य महाराष्ट्रात २० ते २५ मे दरम्यान काही ठिकाणी अतिवृष्टी होण्याची शक्यता वर्तवण्यात आली आहे. २१ मे रोजी कोकणात अत्यंत अतिवृष्टी होण्याचा इशारा दिला आहे. मराठवाड्यात २० आणि २१ मे रोजी काही भागांत जोरदार पाऊस पडू शकतो. या काळात वीजांच्या कडकडाटासह वादळी वारे ५० ते ६० किमी प्रतितास वेगाने वाहण्याची शक्यता आहे.
विदर्भात सुद्धा २० ते २३ मे या कालावधीत वादळी वाऱ्यासह वीजा चमकत हवामान असणार आहे. तसेच काही ठिकाणी मुसळधार पावसाची शक्यता आहे.
राज्यातील शेतकऱ्यांनी या हवामानाच्या पार्श्वभूमीवर योग्य ती खबरदारी घ्यावी, उघड्यावर ठेवलेले पीक उत्पादन सुरक्षित स्थळी हलवावे, काढणी केलेल्या पीकांची योग्य व्यवस्था करावी. तसेच जोरदार वाऱ्यामुळे होणाऱ्या झाडांच्या किंवा झोपड्यांच्या नुकसानापासून बचाव करण्यासाठी शक्यतो घरातच राहावे. वीज पडण्याच्या शक्यतेमुळे झाडाखाली थांबणे किंवा विजेचा संपर्क असलेल्या वस्तूंना हात लावणे टाळावे.
पुढील पाच दिवस कोकण, मध्य महाराष्ट्र, मराठवाडा आणि विदर्भात हवामान अस्थिर राहण्याची शक्यता असून, काही भागांत मुसळधार पावसामुळे रस्ते बंद होणे, शहरी भागात पाणी साचणे यासारख्या घटना घडू शकतात. तसेच जोरदार वाऱ्यामुळे उभ्या पिकांचे नुकसान होण्याची शक्यता आहे. हवामान विभागाकडून यासंदर्भात सतर्क राहण्याचे आवाहन करण्यात आले आहे.09:59 AM
