Weather forecast : यंदाचा नैऋत्य मोसमी पाऊस (Southwest Monsoon) नेहमीपेक्षा नऊ दिवस आधी म्हणजे ३० मे रोजी केरळमध्ये दाखल झाला होता. आता त्याने संपूर्ण देशातूनही वेळेआधीच म्हणजे १६ ऑक्टोबर रोजी निरोप घेतला आहे. हवामान विभागाच्या माहितीनुसार, सामान्यतः मान्सूनचा परतीचा प्रवास १५ ऑक्टोबरनंतर पूर्ण होतो, मात्र यंदा तो ६ दिवस आधीच संपला.
या वर्षी मान्सूनने सुरुवातीपासूनच वेग धरला होता. केरळमध्ये ३० मे रोजी आगमन झाल्यानंतर तो लवकरच महाराष्ट्र, मध्य भारत आणि उत्तर भारतात पोहोचला. मात्र, जून-जुलैमध्ये काही भागांत पावसाची अनियमितता जाणवली. सप्टेंबरमध्ये मात्र जोरदार पावसामुळे काही राज्यांत पूरसदृश्य परिस्थिती निर्माण झाली होती.
हवामान विभागाच्या आकडेवारीनुसार, देशभरात सरासरीच्या तुलनेत ६% कमी पाऊस झाला. महाराष्ट्रातही काही भागांत पावसाचे प्रमाण समाधानकारक असले तरी मराठवाडा आणि विदर्भात काही ठिकाणी पावसाची कमतरता जाणवली. याचा थेट परिणाम खरीप हंगामावर आणि रब्बी पेरणीवर होण्याची शक्यता आहे.
मान्सूनच्या लवकर आगमनामुळे शेतकऱ्यांनी सुरुवातीला पेरण्या लवकर केल्या, मात्र नंतरच्या टप्प्यात पावसाने दडी मारल्याने पिकांचे नुकसान झाले. आता रब्बी हंगामासाठी पाण्याचा साठा आणि हवामानाचा अंदाज महत्त्वाचा ठरणार आहे. जलसाठ्यांची स्थिती काही प्रमाणात समाधानकारक असली तरी पुढील काही आठवडे निर्णायक ठरणार आहेत.
हवामान विभागाने आता उत्तर भारतात थंडीची चाहूल लागण्यास सुरुवात झाल्याचे संकेत दिले आहेत. मान्सूनच्या एकूण प्रवासावर नजर टाकल्यास, यंदा त्याने वेगाने आगमन करून लवकरच निरोप घेतला, मात्र त्याचा परिणाम शेती, जलसाठे आणि हवामान चक्रावर दीर्घकालीन राहण्याची शक्यता आहे.
