अतिवृष्टीच्या पार्श्वभूमीवर पंतप्रधान पीकविमा योजनेत मदत निश्चित करण्यासाठी कृषी विभाग सरासरी उत्पादकतेचा आधार घेत असून, त्यातून शेतकऱ्यांचे वास्तविक नुकसान किती झाले आहे हे ठरवले जात आहे. मात्र, काही शेतकऱ्यांच्या क्षेत्रांत नुकसान न होता उलट त्यांच्या उत्पादकतेत वाढ झाल्याचेही स्पष्टपणे दिसून आले आहे. अशा परिस्थितीत वाढीव उत्पादकतेचा वापर केवळ शासकीय सोयाबीन खरेदी केंद्रांसाठीच ग्राह्य धरण्यात येणार असून, इतर योजनांमध्ये किंवा अन्य कोणत्याही ठिकाणी त्याचा उपयोग करता येणार नाही. या ठिकाणी नियमित सरासरी उत्पादकतेलाच आधार मानण्याचे निर्देश देण्यात आले असून, जादा उत्पादनाचा हा विशेष विचार फक्त यंदाच्या खरीप हंगामातील अपवादात्मक परिस्थितीपुरताच लागू राहणार असल्याचे कृषी विभागाने स्पष्ट केले आहे.