Onion rate : २०२५ हे वर्ष कांदा उत्पादक शेतकऱ्यांसाठी अत्यंत हालाखीचे ठरले असून संपूर्ण वर्षभर बाजारभावातून अपेक्षित दिलासा मिळू शकला नाही. सातत्याने कमी दर, वाढलेला उत्पादन खर्च आणि अनिश्चित बाजारस्थिती यामुळे शेतकऱ्यांचे आर्थिक गणित कोलमडले. आता २०२६ या नव्या वर्षात तरी कांदा बाजारातून दिलासा मिळतो का, याकडे सर्वांचे लक्ष लागले आहे.

 ०२ जानेवारी २०२६ रोजी, बाजारात जवळपास ०२ लाख क्विंटलहून अधिक कांद्याची आवक झाली असून, या वाढलेल्या आवकेमुळे आगामी काळातील दरांची दिशा काय राहणार, हे पाहणे शेतकऱ्यांसाठी निर्णायक ठरणार आहे.

आजच्या बाजारातील दर पाहता विविध मंड्यांमध्ये कांद्याच्या वेगवेगळ्या प्रकारांना संमिश्र भाव मिळाल्याचे चित्र आहे. उन्हाळ कांद्याला पिंपळगाव बसवंत बाजारात किमान ३०० रुपये तर सरासरी १६०० रुपये दर मिळाला असून, देवळा बाजारात सरासरी १००० रुपये, सटाणा बाजारात १३६५ रुपये आणि कळवण बाजारात १५५० रुपये भाव नोंदवला गेला. त्याचबरोबर पिंपळगाव बसवंत मार्केटमध्ये पोळ कांद्याला सरासरी १७०० रुपयांपर्यंत दर मिळाल्याने काही प्रमाणात दिलासा दिसून येतो.

लाल कांद्याच्या बाबतीत सोलापूर बाजारात १२०० रुपये, लासलगाव निफाडमध्ये १८०० रुपये, धुळे बाजारात १४०० रुपये, संगमनेरमध्ये १३०५ रुपये, परंडा बाजारात १४५० रुपये तर देवळा बाजारात १६५० रुपये दर मिळाला आहे. यासोबतच पुणे बाजारात लोकल कांद्याला सरासरी १३५० रुपयांपर्यंत भाव मिळाल्याने आगामी काळातील बाजारस्थितीकडे शेतकऱ्यांचे लक्ष लागले आहे.