Harabhara rate : स्थानिक कृषी उत्पन्न बाजार समितीत १४ फेब्रुवारी रोजी नवीन हंगामातील हरभरा खरेदीला उत्साहात प्रारंभ झाला असून पहिल्याच दिवशी सुमारे १५० क्विंटल आवक नोंदली गेली. पांडुरंग सीताराम तेडे (मु. पाथरगाव) व गणपत रामचंद्र गावनर (मु. कळमजापूर) या शेतकऱ्यांच्या मालाला प्रथम बहुमान देत खुल्या लिलाव पद्धतीने विक्री करण्यात आली. व्यापारी अनिल गावंडे यांनी प्रति क्विंटल ५,३५१ रुपयांची सर्वाधिक बोली लावत खरेदी केली, ज्यामुळे हंगामाची सुरुवात सकारात्मक वातावरणात झाली असली तरी सध्या मिळणारे दर हे भारत सरकारने २०२६-२७ हंगामासाठी जाहीर केलेल्या ५,८७५ रुपये प्रति क्विंटल किमान आधारभूत किंमतीपेक्षा कमी असल्याचे दिसून येते. बाजारात नवीन हरभऱ्याची आवक वाढत असून मागणी, गुणवत्ता आणि स्थानिक स्पर्धेवर दर अवलंबून आहेत; त्यामुळे पुढील काही दिवसांत दरांमध्ये चढ-उतार होण्याची शक्यता व्यक्त केली जात आहे. बाजार समिती शेतकऱ्यांना योग्य व स्पर्धात्मक दर मिळावा यासाठी कटिबद्ध असल्याचे वीरेंद्र जगताप यांनी स्पष्ट केले आहे.

नवीन हरभऱ्याच्या बाजारभावात विविध मार्केटनुसार फरक पाहायला मिळत आहे. पुणे मार्केटमध्ये हरभऱ्याला किमान ६,५०० रुपये तर सरासरी ६,७५० रुपये प्रति क्विंटल असा दर मिळाला, जो सध्या तुलनेने उच्च स्तरावर मानला जात आहे. जळगाव – मसावत मार्केटमध्ये चाफा हरभऱ्याला किमान ४,९०० रुपये आणि सरासरी ४,९२५ रुपये दर मिळाला. तसेच वरुड मार्केटमध्ये लोकल हरभऱ्याचा सरासरी दर ४,९६९ रुपये नोंदवण्यात आला, तर पाथरी मार्केटमध्ये प्रति क्विंटल सुमारे ४,९०० रुपये दर मिळाल्याची माहिती आहे. एकूणच बाजारात दरांमध्ये स्थानिक मागणी, गुणवत्ता आणि आवक यानुसार चढ-उतार होत असल्याचे चित्र दिसून येत आहे.