Tur rate : नैसर्गिक संकटांमधून कसाबसा बचावलेल्या तूर पिकाला आता बाजारातील पडत्या दरांचा मोठा फटका बसत आहे. यंदाच्या खरीप हंगामात ऑगस्ट-सप्टेंबरमधील अतिवृष्टीमुळे सोयाबीनसह तूर आणि कापूस पिकांनाही नुकसान सहन करावे लागले; तरीही उभे राहिलेले तूर पीक शेतकऱ्यांसाठी दिलासा ठरण्याची अपेक्षा होती. मात्र काढणीनंतर विक्रीसाठी बाजारात आलेल्या मालाला अपेक्षित दर मिळत नाहीत. हिंगोली कृषी उत्पन्न बाजार समितीच्या मोंढ्यात फेब्रुवारीच्या पहिल्या आठवड्यात जवळपास ९ हजार रुपये प्रति क्विंटलपर्यंत पोहोचलेला दर अचानक घसरून ७,५०० ते ८ हजार रुपयांदरम्यान आल्याने शेतकऱ्यांना प्रति क्विंटल ५०० ते ७०० रुपयांचा तोटा सहन करावा लागत आहे. अतिवृष्टीतून वाचलेली तूर बाजारात मात्र घसरल्याने तूर उत्पादकांमध्ये निराशेचे वातावरण पसरले आहे.