Weather update : भारतीय हवामान खात्याने दिनांक ६ मे २०२५ रोजी सकाळी साडेआठ वाजता प्रसिद्ध केलेल्या बुलेटिननुसार महाराष्ट्रात पुढील काही दिवसांमध्ये हवामानात लक्षणीय बदल होण्याची शक्यता आहे. राज्यातील अनेक विभागांत मेघगर्जनेसह वादळी वारे, विजांचा कडकडाट, हलक्यापासून मध्यम पावसाची शक्यता असून काही भागांत गारपीट होण्याचा इशाराही देण्यात आला आहे.
उत्तर महाराष्ट्र, मराठवाडा, विदर्भ, पश्चिम महाराष्ट्र, कोकण आणि घाटमाथा भागांत पुढील ४ ते ५ दिवस वातावरण ढगाळ राहण्याची शक्यता आहे. विशेषतः ६ ते १० मे दरम्यान अनेक जिल्ह्यांमध्ये वादळी वाऱ्यांसह पावसाचा अंदाज वर्तवण्यात आला आहे.
विदर्भातील नागपूर, वर्धा, अकोला, यवतमाळ, चंद्रपूर, भंडारा, गडचिरोली आणि गोंदिया या जिल्ह्यांत वादळी वाऱ्यांसह विजांच्या कडकडाटासह पाऊस पडण्याची शक्यता आहे. यापैकी काही जिल्ह्यांसाठी हवामान खात्याने यलो अलर्ट जारी केला आहे. ६ ते ९ मेदरम्यान गडचिरोली, चंद्रपूर, यवतमाळ आणि नागपूरमध्ये पावसाबरोबरच वाऱ्याचा वेग ३० ते ४० किमी प्रतितासापर्यंत जाऊ शकतो.
मराठवाड्यातील औरंगाबाद, लातूर, बीड, परभणी, नांदेड आणि हिंगोली या जिल्ह्यांमध्ये देखील पावसाची शक्यता असून गारपीट होण्याचा धोका अधोरेखित करण्यात आला आहे. या भागात ढगाळ वातावरण राहील व तापमान काहीसे घटेल.
कोकण आणि घाटमाथ्याच्या रत्नागिरी, रायगड आणि पालघर जिल्ह्यांत ७ ते ९ मेदरम्यान विजांसह पावसाची शक्यता असून किनारपट्टीच्या भागांत दमट हवामान राहील. याचबरोबर पश्चिम महाराष्ट्रातील पुणे, सातारा, कोल्हापूर आणि सांगली जिल्ह्यांतही हलका पाऊस होण्याची शक्यता आहे.
राज्यातील बहुतांश भागांत दिवसाचे तापमान ३६ ते ४० अंश सेल्सियस दरम्यान राहील. पावसाच्या शक्यतेमुळे काही भागांत उष्णतेपासून थोडा दिलासा मिळण्याची शक्यता आहे.
देशपातळीवर पाहता, पूर्व भारतातील पश्चिम बंगाल, बिहार, झारखंड, ओडिशा आणि आसाम या भागांत पावसाचा जोर अधिक राहील. दक्षिण भारतात केरळ, कर्नाटक व तामिळनाडूमध्येही मान्सूनपूर्व पावसामुळे वातावरण दमट व ढगाळ राहील. दिल्ली, हरियाणा, पंजाब व राजस्थानमध्ये उष्णतेचा तीव्रपणा कमी होण्याची चिन्हं आहेत.
या पार्श्वभूमीवर शेतकऱ्यांनी हवामान बदलाचा अंदाज लक्षात घेऊन शेतीची कामे पुढे ढकलावीत. ज्याठिकाणी गारपीट होण्याचा इशारा आहे, तिथे साठवलेले पीक व जनावरांचे संरक्षण करावे. हवामानाच्या बदलामुळे कीड व रोगाचा प्रादुर्भाव वाढू शकतो, त्यामुळे योग्य ती काळजी घेणे आवश्यक आहे. हवामान विभागाकडून दररोज येणारे इशारे व अलर्ट वेळेवर तपासावेत.
