Rahuri University’s : महाराष्ट्रात यंदा मान्सून नेहमीपेक्षा लवकर दाखल झाला असून, अनेक भागांत पावसाने हजेरी लावली आहे. कोकण, विदर्भ, मराठवाडा व मध्य महाराष्ट्रात अवकाळी पावसामुळे शेतीवर परिणाम झाला आहे. मात्र, हवामान तज्ज्ञांच्या मते खरीप पेरणीबाबत घाई न करता योग्य वाफसा स्थितीची वाट पाहणे गरजेचे आहे.
या पार्श्वभूमीवर खरीप हंगामासाठी शेतकऱ्यांच्या पसंतीस उतरणारे फुले समर्थ कांदा बियाणे आता विक्रीसाठी उपलब्ध करण्यात आले आहे. महात्मा फुले कृषी विद्यापीठ, राहुरीने त्यांच्या प्रसिद्ध “फुले समर्थ” कांदा बियाण्याची विक्री आज दिनांक २६ मे २०२५ पासून सुरू करणार असल्याची माहिती दिली आहे. या बियाण्याला शेतकऱ्यांकडून मागील काही हंगामांपासून चांगली पसंती मिळत असून, दर्जेदार उत्पादनासाठी ते उपयुक्त ठरत असल्याचा शेतकऱ्यांचा अनुभव आहे.
हे बियाणे उत्पादनक्षम, टिकावू व रोगप्रतिरोधक असून, कांद्याला चांगला दर मिळवून देणारे असल्यामुळे शेतकऱ्यांमध्ये याला विशेष मागणी असते.
कांदा बियाणे खरेदीसाठी उपलब्ध अधिकृत केंद्रे:
1. मध्यवर्ती परिसर, महात्मा फुले कृषी विद्यापीठ, राहुरी
2. कृषी संशोधन केंद्र, चास, जिल्हा अहिल्यानगर
3. कृषी संशोधन केंद्र, सावळीविहीर, तालुका राहाता, जिल्हा अहिल्यानगर
4. कृषी महाविद्यालय, हळगाव, तालुका जामखेड, जिल्हा अहिल्यानगर
5. कृषी विज्ञान केंद्र, धुळे
6. कृषी संशोधन केंद्र, निफाड, जिल्हा नाशिक
7. कांदा व द्राक्ष संशोधन केंद्र, पिंपळगाव बसवंत, जिल्हा नाशिक
8. छत्रपती शिवाजी महाराज कृषी विज्ञान संकुल, काष्टी मालेगाव, जिल्हा नाशिक
9. कृषी महाविद्यालय, पुणे
10. कृषी विज्ञान केंद्र, बोरगाव, जिल्हा सातारा
फुले समर्थ बियाणांची वैशिष्ट्ये
– फुले समर्थ बियाणे उच्च उत्पन्नक्षम आहे.
– या कांद्याला रोगप्रतिकारक क्षमता चांगली आहे.
– बाजारात टिकावू आणि चांगला दर मिळवणारे उत्पादन मिळते.
– उत्पादन खर्चावर नियंत्रण राखून नफा मिळवणारा पर्याय.
विद्यापीठाने सर्व शेतकरी बंधूंना विनंती केली आहे की, त्यांनी आपल्या नजीकच्या अधिकृत केंद्रावरूनच बियाण्याची खरेदी करावी. स्थानिक बाजारात होणाऱ्या खोट्या व कमी दर्जाच्या बियाण्यांपासून सावध राहून, विद्यापीठ मान्यताप्राप्त केंद्रातूनच खात्रीशीर व गुणवत्तापूर्ण बियाण्यांची निवड करावी.
फुले समर्थ कांदा बियाण्याच्या वेळेवर आणि योग्य वापरामुळे शेतकऱ्यांना अधिक नफा मिळवता येईल, असा विश्वास विद्यापीठाने व्यक्त केला आहे.
