Rain update : आजच्या स्थितीनुसार, दक्षिण-पश्चिम मॉन्सूनने आपली हद्द मुंबई, अहिल्यानगर, आदिलाबाद, दंतेवाडा, रायगड, अगरतळा आणि गोलपारा या ठिकाणी गाठली आहे. याचा अर्थ महाराष्ट्राच्या दक्षिण किनारपट्टीसह काही भागांमध्ये मॉन्सूनचे आगमन झाले असून, पुढील दोन दिवसांत उर्वरित विदर्भ, छत्तीसगड, ओडिशा आणि पश्चिम बंगालमध्येही मॉन्सून दाखल होण्याची शक्यता आहे.
मागील २४ तासांमध्ये महाराष्ट्रातील काही भागांत मध्यम स्वरूपाचा पाऊस पडला आहे. महाबळेश्वर येथे सर्वाधिक ७ सेंटीमीटर पावसाची नोंद झाली. सोलापूर आणि नाशिक जिल्ह्यांत प्रत्येकी २ सेंटीमीटर पावसाची नोंद झाली आहे. कोकणातील अलिबाग येथे ४ सेंटीमीटर, तर मुंबई आणि माथेरान येथे २ ते ३ सेंटीमीटर पाऊस पडला. हे प्रमाण काही भागांत शेतीसाठी फायदेशीर ठरले असले तरी, महाबळेश्वर भागात जोरदार सरींमुळे काही ठिकाणी शेती व वाहतूक व्यवस्थेला अडथळा निर्माण झाला.
पुढील पाच दिवसांतील हवामानाचा अंदाज पाहता महाराष्ट्रातील अनेक भागांमध्ये पावसाची शक्यता वर्तवण्यात आली आहे. २९ आणि ३० मे रोजी कोकण, गोवा, विदर्भ, उत्तर कर्नाटका, तळ कोकण व मध्य महाराष्ट्रात वीजांच्या कडकडाटासह पावसाचा इशारा देण्यात आला आहे. काही भागांत ३०-५० किमी प्रतितास वेगाने वारे वाहण्याची शक्यता आहे. विदर्भ, मराठवाडा आणि कोकणात विजांच्या कडकडाटासह जोरदार सरींचा अंदाज हवामान खात्याने वर्तवला आहे.
हवामान विभागाने दिलेल्या सूचनेनुसार, ३१ मे ते ४ जून या कालावधीत महाराष्ट्रातील बहुतांश भागांत पावसाने विश्रांती घेण्याची शक्यता आहे. या काळात कोकण, गोवा, कोल्हापूर, सातारा, पुणे आणि विदर्भातील काही ठिकाणी तुरळक पावसाच्या सरी पडू शकतात, पण एकूणच पावसाचा जोर कमी राहील. त्यामुळे शेतकऱ्यांनी या सुट्टीच्या दिवसांचा वापर मशागत, खते व बियाण्यांची तयारी यासाठी करावा, असे कृषी सल्लागारांचे मत आहे.
भारतीय हवामान खात्याने शेतकऱ्यांना खबरदारी घेण्याचे आवाहन केले आहे. शेतात पाण्याचा निचरा सुरळीत करण्यासाठी नाल्यांची स्वच्छता करावी. गारपीटीचा धोका असलेल्या भागांत भाजीपाला व बागायती पिकांना आच्छादन द्यावे. पिकांची काढणी झाल्यास ती सुरक्षित ठिकाणी ठेवावी. जनावरे घरात ठेवावीत आणि विजेच्या गडगडाटाच्या वेळी घराबाहेर जाणे टाळावे.
संपूर्ण राज्यात शेतकरी बांधवांसाठी हवामानाच्या बदलत्या स्थितीमुळे पुढील काही दिवस निर्णायक ठरणार आहेत. योग्य नियोजन आणि सतर्कतेने निसर्गाचा सामना करणे हे यशस्वी शेतीचे गमक ठरेल.
