Red alert : आज २७ मे २०२५ रोजी सकाळपर्यंतचा हवामान विभागाचा अहवाल पाहता, नैऋत्य मोसमी (monsoon rain 2025) पावसाने महाराष्ट्रात आपली सुरुवात केली असून तो मुंबई, पुणे, सोलापूर, कलबुर्गी, महबूबनगर, कवलीपर्यंत पोहोचला आहे. यामुळे महाराष्ट्रातील कोकण, पश्चिम महाराष्ट्र, मराठवाड्याचा काही भाग तसेच विदर्भाच्या काही भागांना मॉन्सूनचा स्पर्श झाला आहे.
➡️ देशभरात हवामानाची स्थिती
देशाच्या हवामानाची स्थिती पाहता, दक्षिण भारतात म्हणजे केरळ, कर्नाटकमध्ये जोरदार पावसाची नोंद झाली आहे. ईशान्य भारतात देखील सातत्याने पावसाचे प्रमाण वाढत आहे. पश्चिम राजस्थानात मात्र उष्णतेची लाट आहे. कोकणात मुंबईसह अनेक भागांत कालही मुसळधार पावसाची नोंद झाली. केरळच्या पलक्कडमध्ये ८ सेंटीमीटर, मथेरान आणि अलिबागमध्ये अनुक्रमे १२ व ७ सेंटीमीटर पाऊस पडल्याची माहिती आहे.
➡️ राज्यातील इशारे आणि अलर्ट
हवामान विभागाने महाराष्ट्रातील काही जिल्ह्यांसाठी पुढील चोवीस तासांसाठी विशेष इशारे दिले आहेत. कोकणात रत्नागिरी, रायगड आणि सिंधुदुर्ग जिल्ह्यांना अति मुसळधार पावसाचा रेड रंगाचा इशारा देण्यात आला आहे. पुणे, सातारा, बीड, लातूर, उस्मानाबाद या जिल्ह्यांसाठी मध्यम ते मुसळधार पावसाचा ऑरेंज इशारा जारी करण्यात आला आहे. विदर्भातील वऱ्हाड, नागपूर, अमरावती, अकोला, यवतमाळ, वाशिम या भागांतही मेघगर्जनेसह वाऱ्याचा जोर आणि जोरदार पावसाची शक्यता असून यलो अलर्ट देण्यात आला आहे. त्यामुळे शेतकऱ्यांनी विशेष काळजी घ्यावी आणि शेतातील पिकांचे संरक्षण करावे.
➡️ पुढील पाच दिवसांचा पावसाचा अंदाज
पुढील पाच दिवस महाराष्ट्रासाठी पावसाने हजेरी लावण्याची शक्यता आहे. २८ मेपासून कोकण, मध्य महाराष्ट्र, दक्षिण व उत्तर कर्नाटका, केरळ आणि तमिळनाडूमध्ये मुसळधार ते अति मुसळधार पावसाचा अंदाज वर्तवण्यात आला आहे. कोकण आणि घाटमाथ्यावर २७ मे रोजीच अति मुसळधार पावसाची नोंद होण्याची शक्यता आहे. २८ ते ३१ मे दरम्यान मध्य महाराष्ट्रातही जोरदार पावसाचा अंदाज आहे. मराठवाड्यात २७ ते २८ मे दरम्यान काही भागांत मुसळधार पावसाचा इशारा देण्यात आला आहे. विदर्भात २७, २९ व ३० मे रोजी पावसाची शक्यता असून, विजांसह वारे देखील असतील. कोकणात दररोज पावसाचा जोर अधिक राहणार आहे. ३० आणि ३१ मे रोजी गोवा, कोकण, मध्य महाराष्ट्र आणि विदर्भात अतिवृष्टी होण्याची शक्यता आहे.
➡️ शेतकऱ्यांसाठी मार्गदर्शन
शेतकऱ्यांनी या हवामान स्थितीकडे गांभीर्याने पाहणे आवश्यक आहे. हवामान खात्याच्या इशाऱ्यांनुसार, ज्या भागांमध्ये पावसाचे प्रमाण अधिक आहे तेथे शेतात पाण्याचा निचरा होईल अशा उपाययोजना कराव्यात. कोकण आणि घाटमाथ्याच्या भागांमध्ये भात रोपवाटिकेची तयारी सुरू करता येईल. तर विदर्भ व मराठवाड्यात काढणी झालेली पिके सुरक्षित ठिकाणी हलवावीत. ढगाळ हवामान, विजांचा कडकडाट व गारपिटीची शक्यता लक्षात घेता शेतीच्या साहित्यासह जनावरे आणि लोकांचेही संरक्षण करणे गरजेचे आहे. अशा स्थितीत शेतकऱ्यांनी हवामान खात्याचे अद्ययावत संदेश नियमितपणे तपासावेत.
