interest rates : सर्वसामान्य नागरिकांसह ग्रामीण भागात आणि विशेषतः शेतकऱ्यांना अधिक व्याजदराचे आमिष दाखवून फसवणूक करणाऱ्यांविरोधात राज्य शासनाने कठोर कारवाईचा इशारा दिला आहे. अशा योजनांवर नियंत्रण ठेवण्यासाठी पोलिस विभागामार्फत विशेष मोहीम सुरू करण्यात आली असून, नागरिकांनी आणि शेतकऱ्यांनी अशा फसव्या योजनांपासून दूर राहावे, असे आवाहन मुख्यमंत्री देवेंद्र फडणवीस यांनी विधानसभेत केले.
विधानसभेत सदस्य भिमराव तापकीर यांनी हा प्रश्न उपस्थित केला होता. यावर उत्तर देताना मुख्यमंत्री फडणवीस म्हणाले की, अनेक शेतकरी कमी वेळेत जास्त पैसे मिळवण्याच्या आशेने अशा योजनांमध्ये गुंतवणूक करतात आणि नंतर आर्थिक फसवणुकीचे बळी ठरतात. त्यामुळे कोणत्याही संस्थेची खातरजमा न करता केवळ अधिक व्याजाच्या आश्वासनावर पैसे गुंतवू नयेत.
ते पुढे म्हणाले की, नागरिकांनी गुंतवणूक करताना संबंधित संस्थेकडे आवश्यक परवाने, नोंदणी आणि अधिकृत मान्यता आहेत की नाही, हे तपासावे. शासनाने ‘फायनान्शियल इंटेलिजन्स युनिट’ कार्यरत केले असून, संशयित योजनांवर बारकाईने नजर ठेवली जात आहे आणि आवश्यक ती कारवाई केली जात आहे.
गृहराज्यमंत्री योगेश कदम यांनी यावेळी विधानसभेत सांगितले की, ‘टोरस’ कंपनीने अशाच प्रकारे आर्थिक फसवणूक केल्याचा गंभीर प्रकार उघड झाला असून, त्या विरोधात मागील तीन महिन्यांपासून एमपीआयडी कायद्यानुसार कंपनीची मालमत्ता जप्त करण्याची प्रक्रिया सुरू आहे.
शेतकऱ्यांसाठी हा इशारा महत्त्वाचा ठरतो कारण त्यांच्यावर आधीच आर्थिक ताण आहे. अशावेळी अधिक व्याजाचे आमिष त्यांना फसवणुकीच्या जाळ्यात ओढू शकते. शासनाच्या मोहीमेव्यतिरिक्त जनजागृतीही गरजेची आहे.
शेतकऱ्यांनी कोणतीही गुंतवणूक करण्यापूर्वी स्थानिक बँक, पतसंस्था, किंवा अधिकृत सरकारी योजनांमधीलच पर्याय निवडावेत. कोणतेही अनधिकृत लोक किंवा संस्था अधिक नफा किंवा व्याजाचे आश्वासन देत असतील, तर त्यांची माहिती पोलिसांकडे देऊन इतरांनाही सावध करावे, असे आवाहन शासनाकडून करण्यात आले आहे.
