सध्या अवकाळी पावसाचे संकट राज्यावर आहे. सोमवारी अचानक ठाणे, मुंबईसह अनेक भागात जोरदार पावसाने हजेरी लावली. यामुळे नागरिकांची तारांबळ उडाली. तसेच राज्यामध्ये काही भागात मागील सलग दोन ते तीन दिवसांपासून अवकाळी पाऊस सुरु असल्याचे चित्र आहे. यामुळे शेतीपिकांसह, बागायतदारांचेही मोठ्या प्रमाणात नुकसान झाले आहे.कांदा, केळी, मिरची, डाळिंब, ऊस, या पिकांचे अवकाळी पावसामुळे मोठ्या प्रमाणावर नुकसान झाले आहे. काही भागामध्ये जनावरांचाही मृत्यू झाला आहे.

तीन एकर केळीची बाग भूईसपाट..

पुणे जिल्ह्यातील शिरूर तालुक्यातील मांडवगण फराटा गावातील राजेंद्र मारूती घाडगे शेतकरी यांची अवकाळी पावसाने तीन एकर केळीची बाग जमीनदोस्त झाली आहे . त्यांनी तीन हजार पाचशे केळीची झाडे तीन एकरांमधे लावली होती.सध्या केळीचे घडही या झाडांना लागले होते. मात्र अचानक आलेल्या पावसाने हे सगळे जमीनदोस्त झाले .त्यांचे या अवकाळी पावसाने 13 लाख रुपयांचे नुकसान झाले असे त्यांनी सांगितले . अवकाळी पावसाने पुणे जिल्ह्यात केळी, ऊस, डाळिंब, कांदा या पिकांचे मोठ्या प्रमाणात नुकसान झाले असून देखील शासनाने नुकसानीचे पंचनामे सुरू केलेले नाहीत. त्यामुळे शेतकऱ्यांनी झालेल्या नुकसानीचा आढावा घेऊन नुकसान भरपाई देण्याची मागणी केली आहे .

दहा एकर केळीची बाग वादळी वाऱ्यासह उद्ध्वस्त..

वादळी वाऱ्याने सांगवी आष्टी गावामधील दहा एकर केळीच्या बागेचे नुकसान झाले आहे . शेतकऱ्यांना अधिकारी उडवा-उडवीची उत्तर देत आहेत . आष्टी तालुक्यातील सांगवी आष्टी येथील शेतकरी किसान गायकवाड, रमेश गायकवाड, दत्तात्रय खेडेकर, नानासाहेब खेडकर,सोमीनाथ खेडकर, मधूकर खेडकर सौरभ खेडकर,या शेतकऱ्यांच्या केळीची बाग वादळी वाऱ्यासह उद्ध्वस्त झाली, त्यामुळे शेतकऱ्यांचे लाखो रुपयांचे नुकसान झाले आहे तसेच अधिकारी गावात येऊन पंचनामे न करता शेतकऱ्यांना उडवा-उडवीचे उत्तर देत आहेत , अधिकाऱ्यांच्या या उडवा-उडवीच्या उत्तराने शेतकरी हाताश झाले आहेत. अधिकारी चांगली वागणूक देत नाहीत, अवकाळी पाऊस,यामुळे न्याय मागायचा कोणाकडे असा प्रश्न पडला आहे .

अवकाळी पावसानं लाखो रुपयांची मिरची सडली..

धान पीक हे मुख्य उत्पादन भंडारा जिल्ह्यामध्ये असले तरी आता नगदी पीक म्हणून अनेक शेतकरी बागायती शेतीच्या माध्यमातून मिरचीचं उत्पादन घेत आहेत. भंडारा जिल्ह्याला गेल्या आठवड्यात अवकाळी पावसाने अक्षरश: झोडपून काढलं. या अवकाळी पावसामुळे भात पिकाचे मोठ्या प्रमाणावर नुकसान झाले . तसेच , पालेभाज्यांच्या शेतीलाही मोठा फटका बसला आहे तर मिरची पिकांनाही नुकसान झाल्याचे भंडारा जिल्ह्यात बघायला मिळाले . ज्या मिरची उत्पादकांनी मिरचीचे उत्पादन घेतले तसेच ज्या व्यापाऱ्यांनी व्यवसाय करण्याकरिता मिरची खरेदी केली, अशा शेतकरी व व्यापारी दोघांना या अवकाळी पावसाचा जबर फटका बसला. किंबहुना या अवकाळी पावसामुळे मिरची सडली आणि आता या मिरचीला मार्केटमध्ये दर ही मिळणार नाही, अशी भीती आता व्यक्त होत आहे.या अवकाळी पावसामुळं छोटे व्यापारी किंवा शेतकऱ्याचा विचार केल्यास त्यांना पाच ते दहा लाख रुपयांचा फटका बसल्याचे बघायला मिळत आहे.

जोरदार पावसामुळे 12 जनावरांचा मृत्यू..

धाराशिव जिल्ह्याच्या काही ग्रामीण भागाला मागील दोन दिवसांमध्ये अवकाळी पाऊस, वादळी वारे अन् विजांच्या कडकडाटाचा जोरदार फटका बसला आहे. . उमरगा तालुक्यातील बेनीतुरा नदीला उन्हाळ्याच्या दिवसामध्ये पुराचे स्वरूप आले. अवकाळी पावसामुळे ऐन उन्हाळ्यात बेनीतुरा नदी प्रवाहित झाल्याचा व्हिडीओ सगळीकडे व्हायरल होत आहे. उन्हाळी पिकांचे, फळबागांचे लोहारा ,धाराशिव, उमरगा, तसेच कळंब तालुक्यातील शेतकऱ्यांच्या पिकांचे मोठे नुकसान झाले आहे. विजांचा फटका 10 गावांना बसला आहे. पावसाच्या थैमानामध्ये 12 जनावरांचा मुत्यू झाला आहे. या अवकाळीचा मोठा तडाखा पशुपालकांना बसला असून प्रशासनाने लवकरात लवकर पंचनामे करावीत व शेतकऱ्यांना जास्तीत जास्त मदत द्यावी, अशी मागणी आता शेतकरी करत आहे

भंडाऱ्यातही अवकाळी पावसाची हजेरी..

हवामान विभागानं अवकाळी पावसाचा अंदाज १९ मेपर्यंत वर्तविला आहे. भंडाऱ्यात अवकाळी पावसाने दोन दिवसांच्या विश्रांतीनंतर मध्यरात्री पुन्हा एकदा हजेरी लावली आहे.उन्हाचा चटका मागील दोन दिवसांपासून जाणवू लागली असता, भंडारा जिल्ह्यातील शेतकऱ्यांचे मागील आठवड्यात झालेल्या जोरदार अवकाळी पावसाने प्रचंड नुकसान झालेले असून त्याच्या नुकसानीचे पंचनामे तातडीने करण्याचे निर्देश जिल्हा प्रशासनाने दिले आहेत.