Farm pond scheme : राज्यातील शेतकऱ्यांसाठी महत्त्वाची बातमी आहे. मागेल त्याला शेततळे योजनेअंतर्गत मिळणाऱ्या अनुदानात वाढ करण्याचा प्रस्ताव अंतिम मंजुरीच्या प्रतीक्षेत आहे, अशी माहिती कृषी मंत्री माणिकराव कोकाटे यांनी विधान परिषदेत दिली. सध्या या योजनेअंतर्गत शेतकऱ्यांना किमान १४,४३३ रुपये ते कमाल ७५,००० रुपये अनुदान दिले जाते, तर वन विभागाच्या योजनेत हे अनुदान तीन लाख रुपयांपर्यंत आहे. त्यामुळे राज्य सरकार हे अनुदान वाढवण्याचा विचार करत आहे.
हमीभाव आणि सोयाबीन खरेदी..
राज्यात १८ पिकांसाठी हमीभाव लागू असून, केंद्र सरकारने ठरवलेल्या दरानुसारच राज्यातही दर ठरवले जातात. सोयाबीन खरेदीसाठी ५६४ केंद्रांवर खरेदी सुरू आहे आणि आतापर्यंत ११.२१ लाख मेट्रिक टन खरेदी झाली आहे.
पीक विमा योजनेत सुधारणा आणि कारवाई
राज्यात १ रुपया पीक विमा योजना राबवली जात असून, २०२३ मध्ये १.७१ लाख आणि २०२४ मध्ये १७ लाख शेतकऱ्यांना या योजनेचा लाभ मिळाला. मात्र, काही ठिकाणी गैरव्यवहार आढळून आल्यामुळे २०२३ मध्ये २,५५,४६८ अर्ज आणि २०२४ मध्ये ४,३०,४४३ अर्ज रद्द करण्यात आले आहेत. १३० सीएससी केंद्रांचे परवाने रद्द करण्यात आले असून, २४ सीएससी चालकांविरोधात गुन्हे दाखल करण्यात आले आहेत.
नमो शेतकरी महासन्मान निधी योजनेतून आर्थिक मदत..
राज्यातील शेतकऱ्यांना वार्षिक ६,००० रुपये थेट बँक खात्यात दिले जात असून, आतापर्यंत ९०.५ लाख शेतकरी कुटुंबांना ८,९६१.३१ कोटी रुपयांची मदत मिळाली आहे.
ठिबक सिंचन आणि स्मार्ट प्रकल्प..
ठिबक सिंचन योजना अधिक प्रभावी करण्यासाठी लॉटरी पद्धत बंद करून प्रथम अर्ज, प्रथम प्राधान्य तत्त्व लागू करण्यात आले आहे. यामुळे लहान शेतकरी, महिला आणि अनुसूचित जाती-जमातीच्या शेतकऱ्यांना अधिक संधी मिळणार आहे.
शेतकऱ्यांसाठी मोठ्या योजना मंजूर..
– स्मार्ट प्रकल्पांतर्गत कोकणातील ६३ योजनांना प्राथमिक आणि ५२ योजनांना अंतिम मंजुरी मिळाली आहे.
– स्वर्गीय बाळासाहेब ठाकरे कृषि व्यवसाय व ग्रामीण परिवर्तन प्रकल्पासाठी २,१०० कोटी रुपये मंजूर.
– नानाजी देशमुख कृषि संजीवनी प्रकल्पाचा दुसरा टप्पा मंजूर, १६,००० कोटी निधी आणि ७,२०१ गावे यामध्ये समाविष्ट.
शेतकऱ्यांसाठी महत्त्वाचे निर्णय लवकरच..
विधान परिषदेत झालेल्या चर्चेत विरोधी पक्ष नेते अंबादास दानवे आणि इतर सदस्यांनी विविध मुद्दे मांडले. कृषी मंत्री कोकाटे यांनी शेतकऱ्यांच्या हितासाठी सरकार ठोस पावले उचलणार असल्याचे स्पष्ट केले. मागेल त्याला शेततळे योजनेच्या अनुदानवाढीचा अंतिम निर्णय लवकरच घेतला जाणार आहे.
