Wheat seeds : पूरग्रस्त शेतकऱ्यांना दिलासा देण्यासाठी पंजाब सरकारने एक मोठा निर्णय घेतला आहे. यंदाच्या मुसळधार पावसामुळे आणि पुरामुळे राज्यातील अनेक शेतकऱ्यांचे पिकांचे प्रचंड नुकसान झाले आहे. काही ठिकाणी शेतजमिनी वाहून गेल्या, तर काही ठिकाणी पिके पूर्णपणे नष्ट झाली. अशा परिस्थितीत रब्बी हंगामात पिकांची लागवड करणे शेतकऱ्यांसाठी कठीण झाले आहे. या पार्श्वभूमीवर पंजाब सरकारने १३ ऑक्टोबरपासून पाच एकरांपेक्षा कमी जमीन असलेल्या सर्व पूरग्रस्त शेतकऱ्यांना मोफत गहू बियाणे देण्याचा निर्णय घेतला आहे. या उपक्रमासाठी पंजाब राज्य बियाणे महामंडळ लिमिटेड (PUNSEED) याची नोडल एजन्सी म्हणून नियुक्ती करण्यात आली असून, सुमारे १.८५ लाख हेक्टर क्षेत्रासाठी बियाणे वाटपाचे नियोजन करण्यात आले आहे.
सरकारच्या मानक कार्यप्रणालीनुसार (SOP), शेतकऱ्यांनी कृषी विभागाच्या अधिकृत पोर्टलवर नोंदणी करणे आवश्यक आहे. नोंदणीदरम्यान, शेतकऱ्यांना त्यांच्या जमिनीच्या मालकीची कागदपत्रे आणि ओळखपत्रे अपलोड करावी लागतील. या माहितीची पडताळणी झाल्यानंतर पात्र शेतकऱ्यांना मोफत बियाणे मिळणार आहे. बियाण्याची किंमत ४ हजार रुपये प्रति क्विंटल असून, ही किंमत राज्य सरकार उचलणार आहे. याशिवाय, खरीप हंगामासाठी घेतलेल्या अल्पकालीन कर्जाच्या परतफेडीची तारीखही सरकारने वाढवली आहे. पूर्वी ३१ जानेवारीपर्यंत असलेली ही मुदत आता ३० जूनपर्यंत वाढवण्यात आली असून, त्यामुळे शेतकऱ्यांना आर्थिक दिलासा मिळणार आहे. या उपक्रमामुळे अनेक शेतकऱ्यांना नव्याने उभे राहण्याची संधी मिळेल आणि रब्बी हंगामासाठी ते आत्मविश्वासाने तयारी करू शकतील.
