Onion rate : लासलगावला या आठवड्याच्या सुरूवातीला असलेले कांदा बाजारभाव नंतरच्या काळात थोडे थोडे वाढून का शुक्रवारपर्यंत तब्बल २ ते ३ रुपयांनी वाढलेले दिसत आहेत. मागच्या शनिवारी आठवड्याच्या शेवटी कांदा बाजारभाव २१ रुपये प्रति किलो होते. त्यानंतर सोमवारी ३ फेबुवारी रोजी बाजार सुरु झाला तेव्हा कांद्याचे बाजारभाव टिकून राहिले. नंतरच्या काळात ते वाढत जाऊन काल शुक्रवार दिनांक ७ फेब्रुवारी रोजी २४ रुपये इतके झाले.
या आठवड्यात मागील आठवड्याच्या तुलनेत कांदा आवक घटलेली दिसून येत आहे. या आठवड्यात सोमवारी २ लाख ९१ हजार क्विंटल होती. त्यानंतर म्ंगळवारी २ लाख २७ हजार क्विंटल, बुधवारी, २ लाख, गुरूवारी पुन्हा २ लाख ४२ हजार, शुक्रवारी १ लाख ६३ हजार क्विंटल अशी आहे. आवकेत चढ उतार होत असला तरी आवक मागच्या आठवड्याच्या तुलनेत कमीच आहे. परिणामी कांदा बाजारभावात एक दोन दिवस चढ उतार होऊन बाजारभाव टिकून राहिलेले आहेत.
देशपातळीचा विचार करायचा झाल्यास मागच्या आठवड्यात याच काळात म्हणजे सोमवार ते शुक्रवार दरम्यान देशात ३ लाख १२ हजार १३६ मे. टन आवक झाली. या आठवड्यात याच काळात म्हणजे सोमवार ते शुक्रवार या काळात घटून २ लाख ७९ हजार ९११ मे. टन इतकी आहे. त्यातही देशात गुजरात आणि महाराष्ट्रात आवक चांगली दिसून येत आहे. गुजरातला या काळात सुमारे ६२ हजार ५८७ मे. टन, तर राज्यात १ लाख ३६ हजार ४४० मे. टन इतकी आवक आहे.
मागच्या आठवड्यात गुजरातमधील या काळातील आवक ७४ हजार ४९ मे. टन आणि महाराष्ट्रातील आवक १ लाख ३४ हजार १३३ मे. टन. इतकी होती. थोडक्यात गुजरातमधील आवक घटली आहे, तर राज्यातील आवक अगदी थोडीशी म्हणजेच २ हजार टनने वाढली आहे. मात्र एकूण आवक कमीच राहिलेली दिसून येत आहे. त्यामुळे बाजारभावही वाढलेले दिसून येत आहेत.
