Agricultural University : खरीप हंगाम तोंडावर आला असतानाच वसंतराव नाईक मराठवाडा कृषि विद्यापीठ, परभणी येथे बियाणे विक्रीला सुरुवात झाली असून, शेतकऱ्यांचा या उपक्रमाला उत्स्फूर्त प्रतिसाद मिळत आहे. खरीप पेरणीसाठी आवश्यक असलेली उच्च प्रतीची व संशोधनाधारित बियाणे येथे उपलब्ध करण्यात आली आहेत. पहिल्याच दिवशी मराठवाडा विभागातील 2000 हून अधिक शेतकऱ्यांनी बियाणे खरेदीसाठी गर्दी केली, हे विशेष लक्षवेधी ठरले आहे.
विद्यापीठाच्या बिज प्रक्रिया केंद्रावर विविध पिकांचे बियाणे उपलब्ध असून, त्यामध्ये ज्वारी, मुग, तुर, सोयाबीन, राळा, नाचणी आणि कापूस यांचा समावेश आहे. खरीप ज्वारीसाठी ‘परभणी शक्ती’ हा जैव संपृक्त वाण उपलब्ध असून, तो शेतकऱ्यांमध्ये मोठ्या प्रमाणावर मागणीचा आहे. मुगासाठी ‘बीएम 2003-2’ हे वाण असून, त्यालाही चांगला प्रतिसाद मिळत आहे.
तुरीच्या बियाण्यांमध्ये लाल वाणांमध्ये ‘बीडीएन 716’ आणि ‘बीएसएमआर-736’, तर पांढऱ्या वाणांमध्ये ‘बीडीएन 711’, ‘बीएसएमआर 853’ आणि ‘गोदावरी’ या वाणांची विक्री केली जात आहे. याशिवाय, सोयाबीनसाठी ‘एमएयुएस 162’, ‘एमएयुएस 158’ आणि ‘एमएयुएस 612’ ही वाणेही उपलब्ध असून, खरीप हंगामाच्या दृष्टिकोनातून शेतकऱ्यांनी याकडे विशेष लक्ष दिले आहे.
कापसाच्या सरळ वाणांमध्ये ‘एनएच 1901 बीटी’ आणि ‘एनएच 1902 बीटी’, तसेच देशी वाणात ‘पीए 810’ उपलब्ध आहेत. याशिवाय, राळा व नाचणी यांसारख्या भरड धान्यांच्या बियाण्यांचाही समावेश करण्यात आला आहे.
पहिल्या दिवशी झालेल्या एकूण बियाणेविक्रीचा हिशोब पाहता, सुमारे 400 क्विंटल बियाण्यांची विक्री झाली. यामध्ये सोयाबीनचे 300 क्विंटल, तुर 90 क्विंटल, मुग 10 क्विंटल, ज्वारी 1 क्विंटल आणि कापूस 1.5 क्विंटल यांचा समावेश होता. यावरून शेतकऱ्यांच्या खरीप हंगामातील तयारीचा अंदाज घेता येतो.
विद्यापीठाच्या परभणी येथील बिज प्रक्रिया केंद्रावर बियाणे विक्री कार्यालयीन वेळेत सुरू असून, लवकरच हे बियाणे विद्यापीठाच्या अन्य कृषी केंद्रांवरही उपलब्ध होणार आहेत. बियाणे मिळवण्यासाठी शेतकऱ्यांना फारशा अडचणींचा सामना करावा लागत नसून, नियोजनबद्ध वितरणामुळे गर्दी असूनही सुरळीत विक्री सुरू आहे.
खरीप हंगामातील वेळेवर व गुणवत्तापूर्ण बियाण्यांची उपलब्धता ही शेतकऱ्यांसाठी अत्यंत महत्त्वाची असते. वसंतराव नाईक मराठवाडा कृषि विद्यापीठाच्या या उपक्रमामुळे शेतकऱ्यांना संशोधनावर आधारित दर्जेदार बियाणे वेळेत उपलब्ध होत असल्याने त्यांच्या उत्पादनक्षमतेत नक्कीच वाढ होण्याची अपेक्षा आहे.
