Soyabin rate : मागील पंधरा दिवसांपासून जिल्ह्यातील कृषी उत्पन्न बाजार समित्यांमध्ये सोयाबीनला हमीभावापेक्षा अधिक दर मिळत असून, शनिवारी प्रतिक्विंटल ५५०० ते ५९०० रुपयांपर्यंत भाव नोंदले गेले आहेत. सातत्याने होत असलेल्या दरवाढीमुळे शेतकऱ्यांनी नाफेड केंद्रांऐवजी थेट बाजार समित्यांकडे मोर्चा वळवला आहे. गेल्या तीन वर्षांत प्रथमच इतक्या मोठ्या प्रमाणात दरवाढ दिसून येत असल्याचे शेतकरी व व्यापारी सांगतात. खरीप हंगामात नैसर्गिक आपत्तीमुळे उत्पादनात घट आणि अपेक्षित दर न मिळाल्याने पेरणी कमी झाली होती; त्याचा परिणाम सध्याच्या मर्यादित उपलब्धतेवर झाला आहे. डिसेंबर २०२५ मध्ये अपेक्षित भाव न मिळाल्यानंतर नाफेडकडून हमीभावाने खरेदी सुरू झाली, मात्र मागील चार दिवसांत बाजारभाव हमीभाव (५३२८ रुपये) ओलांडल्याने व्यवहार बाजार समित्यांत वाढले आहेत. मंगळवारी सांगली मार्केट यार्डात ५५०० ते ५९०० रुपये प्रतिक्विंटल दर मिळाल्याची माहिती बाजार समितीचे सचिव महेश चव्हाण यांनी दिली.