पशुसंवर्धन विभागाद्वारे उद्योजकता व कौशल्य विकासावर आधारीत सन २०२१-२२ या वर्षापासून नविन सुधारित राष्ट्रीय पशुधन अभियान या योजनेस केंद्र शासनाने मंजुरी दिली आहे.सदर योजने अंतर्गत कुक्कुट पालन,शेळी- मेंढी पालन, वराह पालन, टीएमआर व फॉडर ब्लॉक निर्मिती पशुखाद्य व वैरण विकास उपअभियांनांतर्गत मुरघास निर्मिती,तसेच वैरण बियाणे उत्पादन या योजनेसाठी ५० टक्के अनुदान उपलब्ध करुन देण्यात येणार आहे.
या योजनेचे मुख्य वैशिष्ट्ये..
वैरण व पशुखाद्य तंत्रज्ञानाचा प्रथमदर्शनी प्रात्यक्षिकाद्वारे प्रचार, प्रसार व विकास करणे वैरण व पशुखाद्य यांमध्ये उद्योजकता विकास करून मागणी व पुरवठ्यातील अंतर कमी करण्यासाठी वैरण प्रक्रिया युनिटची स्थापना करण्यास प्रोत्साहित करणे,आणि स्थानिक पातळीवर योग्य किंमतीमध्ये वैरणीची व चाऱ्याची उपलब्धता वाढवणे.
अनुदानाची अधिकता मर्यादा रु.२५ लक्ष कुक्कुट पालनाकरीता,रु.३० लक्ष वराह पालनाकरीता आणि रु. ५० लक्ष शेळी मेंढी पालनाकरीता , रु.५० लक्ष पशुखाद्य व वैरण विकास यासाठी अशी आहे. प्रकल्पासाठीचा स्वतःच्या हिश्या व्यतिरीक्त उर्वरित गरजेचा निधी कर्जाव्दारे बँकेकडून उपलब्ध करुन घ्यावयाचा आहे.
कोण कोण लाभ घेऊ शकते .
सदर योजनेचा लाभ व्यक्तीगत व्यवसायीक, उत्पादक संस्था, स्वंय सहाय्यता बचत गट,शेतकरी सहकारी संस्था, खाजगी संस्था, सहकारी दुध उत्पादक संस्था, सह जोखिम गट (जेएलजी),कलम ८ अंतर्गत स्थापन झालेल्या कंपनी, सहकारी संस्था, स्टार्टअप ग्रुप इत्यादी घेवू शकतात.
कोणती कोणती कागदपत्रे लागतात?
ऑनलाईन पध्दतीने सदर योजनांच्या लाभाकरीता अर्ज करावयाचा आहे , अर्ज सादर करताना सविस्तर प्रकल्प अहवाल (डीपीआर), रहिवाशी पुरावा (मतदान ओळखपत्र, वीज देयकाची प्रत), आधार कार्ड, पॅन कार्ड, छायाचित्र,अनुभवाचे प्रमाणपत्र, वार्षिक लेखामेळ, आयकर रिटर्न, बँकेचा रदद केलेला चेक इत्यादी सादर करणे (अपलोड) अनिवार्य असून, जमिनीचे कागदपत्र, जीएसटी नोंदणी,प्रशिक्षण प्रमाणपत्र, इत्यादी उपलब्ध असल्यास सादर करावे.
