कृषी मंत्री धनंजय मुंडे यांनी लातूर मधील विलासराव देशमुख कृषी जैवतंत्रज्ञान महाविद्यालयाच्या तातडीच्या दुरुस्तीसाठी लवकरच २ कोटी रुपयांचा निधी देण्याचा तसेच संपूर्ण नूतनीकरणासाठी सविस्तर प्रकल्प अहवाल सादर करण्याचे आदेश दिले आहेत . वसंतराव नाईक मराठवाडा कृषी विद्यापीठ अंतर्गत असलेल्या लातूर येथील विलासराव देशमुख कृषी जैवतंत्रज्ञान महाविद्यालय अडचणी दूर करण्याविषयी मंत्रालयात आयोजित बैठकीत धनंजय मुंडे बोलत होते.
या बैठकीचे आयोजन आमदार सतीश चव्हाण यांच्या मागणीवरून करण्यात आले होते. या बैठकीस आमदार सतीश चव्हाण,महाराष्ट्र कृषी शिक्षण परिषदेचे संचालक हेमंत पाटील, आमदार रमेश कराड, महाविद्यालयाचे प्राचार्य डॉ. बाबासाहेब ठोंबरे, गोविंदराव देशमुख ,डॉ.जहागीरदार तसेच मंत्रालयातील विविध अधिकारी उपस्थित होते.
या जिल्यातील कृषी महाविद्यालयाचा प्रस्ताव सादर करावा.
वसंतराव नाईक मराठवाडा कृषी विद्यापीठ अंतर्गत असलेल्या छत्रपती संभाजीनगर जिल्ह्यात एकही शासकीय कृषी पदवी किंवा पदव्युत्तर पदवी महाविद्यालय नाही त्यामुळे शासनाने नवीन महिला कृषी महाविद्यालय सुरू करण्याचा निर्णय घेतला आहे. या महाविद्यालयाच्या स्थापनेसाठी यावेळी मंत्री मुंडे यांनी निधी मागणीचा प्रस्ताव वित्त विभागास सादर करण्याचे निर्देश दिले आहेत.
अद्रक संशोधन केंद्रास पळसवाडी येथील जमीन..
कृषी विभागाने अद्रक संशोधन केंद्र स्थापन करण्याचा निर्णय गल्ले बोरगाव, ता.खुलताबाद जि. छत्रपती संभाजीनगर येथे घेतला आहे. त्यासाठी उपलब्ध असणारी विद्यापीठाची जमीन अपुरी पडत असल्यामुळे पळसवाडी येथील जमीन या प्रकल्पासाठी मागणी करण्याचा निर्णय घेण्यात आला. त्यासाठी छत्रपती संभाजीनगरच्या जिल्हाधिकाऱ्यांकडे विद्यापीठाने लवकरात लवकर जमीन मागणीचा प्रस्ताव सादर करावा, असे निर्देश कृषी मंत्री धनंजय मुंडे यांनी दिले .
