सध्या बाजारात तूरीचे बाजारभाव हे हमीभावापेक्षा कमी आहेत. सरकारने नुकतीच हमीभाव खरेदी सुरू केली, तरी अनेक शेतकरी स्थानिक बाजारातही तूर विकणार आहेत. त्यांना मे महिन्यात म्हणजेच चालू महिन्यात तुरीचे संभाव्य बाजारभाव काय राहतील याची उत्सुकता आहे. कृषी विभागाच्या स्मार्ट प्रकल्पाच्या बाजार माहिती विश्लेषण आणि जोखीम व्यवस्थापन कक्षाने तूरीच्या संभाव्य बाजारभावाबद्दल विवेचन केले आहे.
भारत हा जगातील सर्वात मोठा तूर उत्पादक तसेच उपभोक्ता देश आहे. भारतातील तूर उत्पादनात महाराष्ट्र, कर्नाटक आणि उत्तर प्रदेश राज्यांचा वाटा ६० टक्के पेक्षा जास्त आहे. तूरीच्या बाजारपेठेवर मागील वर्षातील तूर साठा, आयात तसेच चालू वर्षातील उत्पादन यांचा परिणाम होताना दिसतो. केंद्र शासनाने तूर निर्यातीसाठी खुली केली असून तूरीचा आयात कोटा मर्यादित ठेवलेला आहे.
माहे डिसेंबर ते एप्रिल हा तुरीचा प्रमुख विक्री हंगाम असतो. चालू वर्ष एप्रिल (२८ एप्रिल २०२५) मधील तुरीची आवक मागील वर्षाच्या तुलनेत जास्त राहिलेली दिसून येत आहे. एप्रिल २०२५ मध्ये १०.३ लाख टन आहे, जी मागील वर्षी याच कालावधीत ७.५ लाख टन होती.
तूर हे खरीप पिक असून त्याची पेरणी जून ते जुलै व काढणी डिसेंबर ते फेबुवारी या दरम्यान केली जाते. भारत सरकारने जाहीर केलेल्या नवीन उत्पादन अंदाजानुसार सन २०२४-२५ मध्ये तुरीचे उत्पादन सुमारे ३५.११ लाख टन होण्याची शक्यता आहे. जे मागील वर्षीच्या तुलनेत जास्त असल्याचे दिसून येत आहे. तसेच महाराष्ट्रातील २०२३-२४ मधील उत्पादन १०.१० लाख टनांवरून सन २०२४-२५ मध्ये १२.६० लाख टनांपर्यंत जाण्याची शक्यता आहे.
नोव्हेंबर २०२४ पासून तुरीच्या किंमती कमी होत आहेत. गतवर्षीच्या दरापेक्षा चालू वर्षी तुरीचे भाव कमी आहेत. मागील तीन वर्षातील लातूर बाजारपेठेतील तुरीच्या में मधील सरासरी किंमती खालीलप्रमाणेः
मे २०२२: रु. ६,०७३/क्विंटल
मे २०२३: रु. ९,०४२/क्विंटल
मे २०२४: रु.११,८४५/क्विंटल
सध्याच्या हंगामासाठी सरकारने खरीप २०२४-२५ साठी जाहीर केलेल्या किमान आधारभूत किंमतीपेक्षा (रु. ७५५०/क्विंटल) सध्याच्या तुरीच्या किंमती कमी आहेत. मागील वर्ष २०२२-२३ च्या तुलनेत २०२३-२४ मध्ये आयात कमी झालेली आहे तर निर्यात वाढलेली आहे. दरम्यान या सर्व माहितीवरून मे महिन्यात लातूर बाजारातील संभाव्य किंमती प्रति क्विंटल ७,००० ते ७,७०० रुपये राहण्याची शक्यता आहे.
