Maharashtra rain alert : भारतीय हवामान विभागाने १६ जुलै रोजी सकाळी जारी केलेल्या अंदाजानुसार महाराष्ट्रातील पावसाचा स्वरूप विभागानुसार वेगळा राहणार आहे. काही भागांमध्ये दमदार पावसाची शक्यता असून काही ठिकाणी उघडीप जाणवू शकते.
कोकण व गोवामध्ये १६ ते २२ जुलैदरम्यान बहुतेक ठिकाणी पावसाचे प्रमाण जास्त राहणार आहे. दररोज बहुतांश भागांत जोरदार सरी येण्याची शक्यता असून, किनारी भागात वाऱ्याचा वेगही वाढलेला असेल. त्यामुळे कोकणातील शेतकऱ्यांनी धान रोपवाटिका व भात लागवडीसाठी पाणी साठवण्याची व्यवस्था करण्याची गरज आहे.
मध्य महाराष्ट्रात (नाशिक, पुणे, अहमदनगर भाग) १६ जुलैला काही ठिकाणी पावसाच्या सरी अपेक्षित असून, १७ ते २२ जुलैदरम्यान पावसाची शक्यता कमी राहील. विशेषतः घाटमाथ्यावरील भागांमध्ये २० व २१ जुलैला काही प्रमाणात पावसाच्या सरी पडू शकतात. मात्र, सर्वसाधारणतः येथे हवामान तुलनेत कोरडे राहण्याची शक्यता असल्याने शेतकऱ्यांनी पाण्याचे नियोजन काळजीपूर्वक करावे.
मराठवाड्यात १६ जुलैला तुरळक ठिकाणी पाऊस अपेक्षित असून, त्यानंतर बहुतांश ठिकाणी पावसाची शक्यता फारशी नाही. १७ ते २२ जुलै दरम्यान हवामान कोरडे राहण्याचा अंदाज आहे. त्यामुळे ज्या शेतकऱ्यांनी अलीकडेच पेरणी केली आहे, त्यांनी पिकांचे पुनः निरीक्षण करून आवश्यक असल्यास आंतरमशागत किंवा पाणी देण्याच्या बाबतीत नियोजन करावे.
विदर्भामध्ये १६ व १७ जुलैला काही भागांमध्ये पावसाच्या सरी राहतील, विशेषतः पूर्व विदर्भात. मात्र, १८ जुलैपासून पावसाचे प्रमाण कमी होण्याची शक्यता आहे. शेतकऱ्यांनी पिकांमध्ये पाणी साचू नये यासाठी योग्य निचरा करावा, तसेच वाफसा स्थितीत खुरपणी करणे उपयुक्त ठरेल.
हवामान विभागाने सादर केलेल्या तक्त्यानुसार, कोकण व गोवा, कोस्टल कर्नाटका आणि केरळ या भागांत १६ ते २२ जुलैदरम्यान जवळपास प्रत्येक दिवशी पावसाचे जोरदार प्रमाण राहील. परंतु महाराष्ट्राच्या इतर भागांमध्ये पावसाचा जोर तुलनेने कमी असेल.
मध्य महाराष्ट्रात २० जुलै रोजी घाटमाथ्याच्या परिसरात पावसाची शक्यता आहे. मराठवाडा मात्र सातही दिवस तुरळक पावसाच्या शक्यतेत आहे. विदर्भात सुरुवातीचे दोन दिवस काहीशा सरींची शक्यता असून, त्यानंतर हवामान कोरडे राहील.
एकूण पाहता, महाराष्ट्राच्या बहुतांश भागांत सध्या पावसाची विश्रांती आहे. कोकण व घाटमाथा वगळता इतरत्र कोरड्या हवामानाचा सामना करावा लागणार आहे. त्यामुळे शेतकऱ्यांनी सिंचनाचे व्यवस्थापन, पेरणीची योग्य वेळ, आणि पाण्याचा योग्य वापर याबाबत अधिक दक्ष राहण्याची गरज आहे. दरम्यान, पुढील आठवड्यात पावसाची परिस्थिती कशी बदलते हे पाहणे महत्त्वाचे ठरेल.
